venerdì 4 novembre 2016

Il pitôr Tiziano madressût

Memoreant une biele mostre fate a Vignesie, li da lis Galariis de Academie, fintremai ai 20 di Avrîl dal 2008. Mi soi metût a scrivi chest articul par disvilupâ madons di estetiche in chest cjanton de critiche d’art.
Tiziano, Pietà (cm. 378 x 347), Venezia, Gallerie dell’Accademia

Isal pussibil par un pitôr meti tai siei cuadris une sene teatrâl? Se cui che al piture al si clame Tiziano Vecellio, alore disin di sì. 
Lui al jere nassût a Plêf di Cjadovri tal 1477 e muart tal 1576. Al è il plui brâf artist dal RinassimentAl jere un om de Republiche di Sant Marc, ma dal pont di viste juridic e jere ancjemò di sot dal Patriarcjât di Aquilee.
Il so spirt teatrâl si è podût viodilu inte mostre «L’ultimo Tiziano e la sensualità della pittura», screade a Vignesie, tes Galariis de Academie ai 26 di Zenâr dal 2008 e sierade ai 20 di Avrîl di chel an. A son stadis in esposizion vincjevot siei grancj cuadris – cualchidun a pene restaurât in chê volte - che a vegnivin, oltri che de Academie, di dodis museus sparniçâts pal mont: Bologne, Bordeaux, Dresde, Dublin, Kromeriz, Londre, Madrid, Napoli, Rome, Rotterdam, Saint Louis e Viene.
Cheste piture di Tiziano, di cuant che al veve sessante agns, e je un tic «a magle», cemût che al à scrit Giorgio Vasari. Si trate di un mût di pinelâ cun tantis sfumaduris. A somee scuasit une anticipazion dal Impressionisim. A son cussì dutis lis oparis di Tiziano madressût. Al somee che i siei cuadris a si lein a la opare di Torquato Tasso o di un Ludovico Ariosto.

Tiziano, San Gerolamo (cm. 137,5 x 97),
Madrid, Museo Thyssen-Bornemisza


La idee da mostre dal 2008 e je vignude ai dirigjents dal «Kunsthistorisches Museum» di Viene, dulà che la mostre e je stade proponude prime di rivâ in Italie e de Sorintendence speciâl pal Pôl museâl venezian. Trê a jerin lis sezions de esposizion: i ritrats, la piture sacre e chê profane. A son soredut lis feminis crotis pituradis di Tiziano a cjapâ il voli dal visitadôr. La sensualitât e salte fûr cu la opare titolade «Danae» o li che e je une «Agane cul pastôr». 
La fuarce estetiche di chê mostre e jere tal fat che si podeve capî il contat di Tiziano cun altris artiscj di chel timp. Di Carpaccio, un so mestri, fintremai a Giorgione, Veronese e Tintoretto. Cualchidun di chescj pitôrs, par sierâ, al à produsût ancje tal Friûl, par nestre fortune.


Un sdavassum tant colorât

Ancje altris autôrs a si son inacuarzûts de piture masse plene di colôrs di Tiziano, scuasit un disordin colorât une vore, o pûr un sdavassum tant colorât. Nol sarà un câs se Roberto Longhi al à scrît, tal 1950, lant daûr dal Giorgio Vasari dal “caos coloratissimo della pittura di Tiziano” (p. 34).

Riferiments bibliografics
Roberto Longhi, Proposte per una critica d’arte, «Paragone», 1, 1950, riedizion cun premetidure di Giorgio Agamben, Pesaro, Portatori d’Acqua, 2014.